〖本地薑專欄．音樂．LMF - LAZY CLAN〗
文：安媃
一！二！兩隻手指！
意義，就只有自由兩個字！
一無所有嘅鬥士！
揸緊中指，唔係你想像中咁易！
正如佢哋喺〈WTF〉前奏嘅自白咁講：「我枝咪嘅作用，就係要來講社會嘅問題，我就要嘮嘈、我就要控訴」，LMF嘅歌粗口橫飛之餘，一直以來都有好強嘅批判意識，〈大懶堂〉反省社會讚頌嘅勤奮向上模範、〈冚家拎〉痛斥偏頗、過火嘅新聞報導。而佢哋早年寫下嘅呢首〈揸緊中指〉，以往聽到熱血沸騰，但最近聽返，只係感到痛心。
自由唔食得，但點解人會願意為咗自由付出一切，唔理代價，做咁多看似毫無意義嘅抗爭？正正是因為見到未來已經「一無所有」。鬥士唔係奴隸，有對抗不公嘅意志，亦會為比食物、居所更重要嘅事情去戰鬥。
「一無所有」嘅迷惘與氣餒，尤其喺年輕人心中，唔容易為他人所理解。對好多大人來講，一無所有嘅意思係物質嘅匱乏。但90後、00後一出世就要同人爭奶粉、爭學位。接受嘅教育只有讀書呢個可能性，對好多人來講「受教育」同「攞學位」係同義詞。而一次次嘅升學試，並唔係靠知識，而只係睇考評局嗰啲連作者本人都唔識答嘅問題會唔會咁啱識應對。負碌完成大學，就發現搵到錢嘅工種少得可憐，揀，亦只有人揀你，唔係你揀人。如果自己嘅志業一個唔好彩唔係律師而係廚師、唔係機師而係司機，咁就只有勞碌營役一世同埋背棄理想兩個選擇。不論係安居、定係樂業，喺呢一代，都看似遙不可及。真正嘅一無所有，係連對人生嘅選擇都冇，只能被浩蕩潮流推住走。
所以自以為窮就叫一無所有嘅人總會問：「以前都係咁咖啦，點解而家啲後生咁唔捱得咖？」問題從來都唔係捱唔捱得，而係捱苦到底為啲乜嘢？。要從一面面高牆出人頭地，需要嘅，係1分天才9分努力，加90分嘅運氣。廢青也是這樣煉成的，我哋唔介意每年都去日韓意法英德旅行，因為就算留喺香港節衣縮食，為五斗米折腰折到拱橋，有些機會都不是屬於我們的。
但起碼，呢個仲係一個文明嘅社會。愛、尊嚴同自由係每個人都有嘅非賣品。因為自由，只要我能付出代價，我哋依然能夠選擇令自己最快樂嘅生活，即使當中仍然難免有好多苦楚。所以當政府想連我哋最後、最重要嘅希冀都破滅埋，我哋理所當然會不惜一切去捍衛最珍視嘅價值，用盡所有可行嘅辦法去守護家園：上書、登報、投票、參選、遊行、請願、集會、絕食、不合作、包圍、佔領，通通都去試。
到今個星期，有人用近乎捨命嘅方式衝擊立法會。
好多人苦口婆心提醒我哋，暴動要坐十年，但既然掌權者拎走一切對我來講最重要最基本嘅嘢，我仲有乜嘢可以輸比佢？咁點解唔搏命同你死過？道理似乎變得不難明白。
人永遠都可以企後一步，話我哋蠢、話咁樣係冇必要。但當有人想去除你嘅家園、你嘅自由、你嘅人性，想移除、引渡呢一條條連繫住人心、土地同身體嘅中指，高舉佢、揸緊佢，唔係你想像中咁易。
P.S. 致同路人：
雖然有好多事都已經超出控制、返唔到轉頭，但其實你望一望條中指，佢唔止連住你，亦都連住所有同路人，你係我哋嘅手足。我哋全部人都好愛、好重視你，好希望可以同你一齊走落去；抗爭路上，每個人可以做嘅事情都唔同，大家仲等待緊你嘅幫助去繼續前進！各位，今宵多珍重，自己去做做到自己就當然最好，做唔到都千祈唔好放棄自己。我哋需要你。
******************************
LMF 約定你28-29.9元朗大棠本地薑大露營見
www.theweekend.hk
#wowandflutterhk
#theweekendhk
Search